خاتون فٹبالر نے اسلام قبول کرلیا، عمرے کی سعادت بھی حاصل

ریاض/مکہ مکرمہ: برازیل سے تعلق رکھنے والی معروف فٹبال کھلاڑی کیتھلین سوزا (Kathellen Sousa) نے اسلام قبول کرنے کے بعد عمرہ ادا کرنے کی سعادت حاصل کر لی ہے۔ کیتھلین سوزا، جو اس وقت سعودی عرب کے نامور کلب النصر (Al-Nassr) کی خواتین ٹیم کی نمائندگی کر رہی ہیں، نے اپنے اس فیصلے کو زندگی کی ایک بڑی مثبت تبدیلی قرار دیا ہے۔

سماجی رابطے کی ویب سائٹ انسٹاگرام پر اپنے جذبات کا اظہار کرتے ہوئے کیتھلین نے لکھا: “چھوٹے قدم، صحیح راستہ تلاش کرنا، مثبت تبدیلی کی کوشش اور زندگی کے اس عظیم انعام کے لیے شکرگزاری۔” انہوں نے مزید کہا کہ وہ اپنی شخصیت کو بہتر بنانے اور سکونِ قلب کی تلاش میں تھیں۔

کیتھلین سوزا گزشتہ دو برسوں سے سعودی عرب میں مقیم ہیں اور النصر کلب کا حصہ ہیں۔ ذرائع کے مطابق، وہاں قیام کے دوران وہ اسلامی اقدار اور کلچر سے بے حد متاثر ہوئیں، جس نے بالآخر انہیں اسلام قبول کرنے کی ترغیب دی۔ ان کے کلب ‘النصر’ نے سوشل میڈیا پر ایک خصوصی ویڈیو شیئر کرتے ہوئے ان کے اس فیصلے کا خیرمقدم کیا اور ان کے لیے خیر و برکت کی دعا کی۔