کراچی: پروفیسر عارف ساقی اور بھتیجے پر تشدد، مرکزی ملزم کونین علی گوہر شاہ گرفتار

کراچی: پروفیسر عارف ساقی اور ان کے بھتیجے پر مبینہ بدترین تشدد کے کیس میں پولیس نے کارروائی کرتے ہوئے مرکزی ملزم کونین علی گوہر شاہ کو گرفتار کر لیا۔

پولیس کے مطابق ملزم کونین علی گوہر شاہ کو پولیس پارٹی نے تعاقب کے بعد گرفتار کیا۔ ملزم موبائل فون بند کرکے مختلف مقامات پر اپنی نقل و حرکت جاری رکھے ہوئے تھا، جس کی گرفتاری کے لیے ایسٹ پولیس کی جانب سے کراچی کے مختلف علاقوں میں چھاپے بھی مارے گئے تھے۔

پولیس کا کہنا ہے کہ گرفتار ملزم کو مزید قانونی کارروائی کے لیے سچل تھانے منتقل کیا جائے گا۔

دوسری جانب قائمہ کمیٹی کے اجلاس میں ملزم کی گرفتاری میں تاخیر پر پولیس کی سخت سرزنش بھی کی گئی تھی۔ چیئرمین قائمہ کمیٹی نے مرکزی ملزم کی عدم گرفتاری پر برہمی کا اظہار کرتے ہوئے پولیس سے فوری کارروائی کا مطالبہ کیا تھا۔

پولیس کے مطابق کیس میں مزید تفتیش جاری ہے اور دیگر ملزمان کے حوالے سے بھی کارروائی کی جا رہی ہے۔