فنکار بھی انسان ہیں، مداح پرائیویسی کا احترام کریں: جگن کاظم

اداکارہ جگن کاظم نے ایک ٹی وی پروگرام میں انکشاف کیا ہے کہ ایک بار جب وہ اپنی والدہ کی شدید بیماری اور پریشانی کے عالم میں گھر کے قریب کسی ڈاکٹر کی تلاش میں تھیں، تو ایک خاتون مداح نے ان کی نازک صورتحال کا خیال کیے بغیر ان کی ویڈیو بنانا شروع کر دی۔ جگن کاظم کے مطابق، وہ اس وقت رو رہی تھیں اور شدید ذہنی دباؤ میں تھیں، لیکن مداح نے ان کی پرائیویسی کا احترام کرنے کے بجائے اس لمحے کو کیمرے میں قید کرنے کو ترجیح دی۔ اداکارہ نے عوام سے اپیل کی ہے کہ فنکار بھی عام انسانوں کی طرح دکھ اور خاندانی مسائل کا شکار ہوتے ہیں، لہٰذا عوامی مقامات پر ان کی نجی زندگی اور جذبات کا لحاظ رکھا جائے۔