عراقی ملیشیا گروپوں کی اردن پر حملے کی منصوبہ بندی، اردن کی جوابی کارروائی کی وارننگ

عراقی ملیشیا گروپوں کی جانب سے حملے کی منصوبہ بندی: اردن کا سخت جوابی کارروائی کا انتباہ

عراقی ملیشیا گروپوں کی جانب سے اردن پر حملوں کی منصوبہ بندی کی اطلاعات کے بعد دونوں ممالک کے درمیان شدید کشیدگی پیدا ہو گئی ہے، جس پر اردنی حکومت نے سخت موقف اختیار کرتے ہوئے جوابی کارروائی کا کھلم کھلا انتباہ جاری کر دیا ہے۔

عرب میڈیا کی رپورٹس کے مطابق اردن کی حکومت نے واضح اور سخت الفاظ میں خبردار کیا ہے کہ اگر عراق کی سر زمین کا استعمال کرتے ہوئے اردن پر کسی بھی قسم کا حملہ یا انفلٹریشن کی کوشش کی گئی تو اس کا فوری اور بھرپور جواب دیا جائے گا۔

اردنی حکام کا کہنا ہے کہ ملک کی سلامتی اور خودمختاری پر کوئی سمجھوتہ نہیں کیا جائے گا۔ رپورٹ کے مطابق اردن نے واضح کیا ہے کہ اگر حملے کی صورتحال پیدا ہوتی ہے تو وہ اپنے دفاع میں عراقی حدود کے اندر سرگرم ان تمام ملیشیا گروپوں اور ان کے ٹھکانوں کو مستقلاً نشانہ بنانے سے نہیں ہچکچائے گا جو ان کارروائیوں میں ملوث ہوں گے۔