آبنائے ہرمز بند کرنے کی کوشش کی تو فوجی کارروائی کریں گے، امریکی نائب صدر کا ایران کو انتباہ

امریکی نائب صدر جے ڈی وینس نے ایران کو سخت ترین الفاظ میں خبردار کرتے ہوئے کہا ہے کہ اگر اس نے آبنائے ہرمز کو بند کرنے یا وہاں سے گزرنے والے بحری جہازوں کو نشانہ بنانے کی کوشش کی تو امریکہ اس کے خلاف براہِ راست اور بھرپور فوجی کارروائی کرے گا۔ واشنگٹن ڈی سی میں ایک اہم نیوز بریفنگ کے دوران جے ڈی وینس کا کہنا تھا کہ امریکی فوج کسی بھی ایسی اشتعال انگیزی کا ترکی بہ ترکی جواب دینے کے لیے مکمل تیار ہے۔ انہوں نے امریکی موقف کو واضح کرتے ہوئے کہا کہ واشنگٹن نے تہران کے سامنے صاف متبادل رکھ دیا ہے؛ اگر ایران تجارتی بحری جہازوں پر حملے بند کر دے تو امریکہ اپنی ناکہ بندی ختم کر دے گا، لیکن اگر جہازوں کو نشانہ بنانے کا سلسلہ جاری رہا تو امریکہ کی جانب سے مزید سخت جوابی عسکری کارروائی عمل میں لائی جائے گی۔

امریکی نائب صدر نے مزید کہا کہ اس وقت ایران کے پاس صرف دو ہی راستے ہیں، یا تو وہ اسٹریٹجک معاہدے کی پاسداری کرتے ہوئے بین الاقوامی بحری راستوں کو کھلا رکھے اور تجارتی جہاز رانی پر حملے روک دے، یا پھر اسے گزشتہ رات کی طرح مسلسل امریکی فضائی اور عسکری کارروائیوں کا سامنا کرنے کے لیے تیار رہنا چاہیے۔ جے ڈی وینس نے واشنگٹن کے پختہ عزم کا اعادہ کرتے ہوئے پریس بریفنگ میں واضح کیا کہ ایران پر امریکی حملوں کا یہ سلسلہ اس وقت تک تعطل کے بغیر جاری رہے گا جب تک ایران اس اہم عالمی بحری گزرگاہ کو مکمل طور پر محفوظ نہیں بنا دیتا اور تجارتی جہازوں پر حملے مستقل طور پر بند نہیں کر دیتا۔