فلم سے نکالے جانے پر رو پڑا تھا: جاوید شیخ

پاکستان شوبز انڈسٹری کے سینئر اور معروف اداکار جاوید شیخ نے اپنے کیریئر کے ایک انتہائی مشکل دور اور جذباتی لمحے کو یاد کرتے ہوئے انکشاف کیا ہے کہ ایک دور میں انہیں فلاپ اداکار قرار دے کر فلم سے نکال دیا گیا تھا اور ان کی جگہ اداکار فیصل رحمٰن کو کاسٹ کر لیا گیا تھا۔

ایک نجی پروگرام میں گفتگو کرتے ہوئے جاوید شیخ نے بتایا کہ ایک فلم کی ناکامی کے بعد انہیں ایک نئی فلم میں مرکزی کردار کی پیشکش کی گئی تھی اور وہ اس پر کام شروع کرنے کے لیے مکمل طور پر تیار تھے۔ تاہم بعد میں فلم سازوں نے انہیں فون کر کے اطلاع دی کہ فلم کے ڈسٹری بیوٹر کا مؤقف ہے کہ وہ اس وقت ایک ناکام اداکار بن چکے ہیں، اس لیے ان کی جگہ فیصل رحمٰن کو شامل کرنے کا فیصلہ کیا گیا ہے۔

جاوید شیخ کا کہنا تھا کہ اس اچانک فیصلے نے انہیں شدید صدمہ پہنچایا اور وہ اس واقعے پر رو پڑے تھے۔ اس دھچکے کے بعد انہیں کئی برس تک سخت جدوجہد کرنا پڑی، تاہم مسلسل محنت اور لگن کے باعث وہ دوبارہ کامیابی کی بلندیوں تک پہنچے۔ انہوں نے مزید بتایا کہ بعد ازاں وہی فلم ساز دوبارہ ان کے پاس فلم کی پیشکش لے کر آئے، لیکن انہوں نے دل میں کوئی رنجش رکھے بغیر پیشہ ورانہ انداز میں ان کے ساتھ کام کیا۔ اداکار کا کہنا تھا کہ زندگی میں اتار چڑھاؤ آتے رہتے ہیں، لیکن محنت اور مثبت رویہ انسان کو سنبھالا دیتے ہیں۔