جاپان میں 7.1 شدت کے زلزلے میں ہلاکتوں کی تعداد 13 ہوگئی، متعدد لاپتہ

جاپان کے جنوب مغربی جزیرے کیوشو میں 7.1 شدت کے زلزلے میں ہلاکتوں کی تعداد 13 ہو گئی ہے، جبکہ امدادی ٹیمیں عمارتوں کے ملبے تلے دبے افراد کی تلاش کے لیے سرگرم عمل ہیں۔ خبر ایجنسی کے مطابق اب تک 9,872 افراد کو محفوظ مقامات پر منتقل کیا جا چکا ہے جبکہ زلزلے کے باعث 36,700 گھر بجلی سے محروم ہیں۔ امریکی جیولوجیکل سروے کے مطابق زلزلہ مقامی وقت کے مطابق شام 4 بج کر 27 منٹ (پاکستانی وقت رات 12 بج کر 27 منٹ) پر آیا۔ کوماموتو میں ایک شاپنگ مال کی دوسری منزل زمین بوس ہونے سے کئی افراد وہاں پھنسے ہوئے ہیں، جبکہ ایک فیکٹری میں چمنی گرنے سے دب جانے والے افراد کو نکالنے کے لیے بھی ریسکیو کارروائیاں جاری ہیں۔