اٹلی کا تمام بڑے شہروں کے لئے شدید گرمی کا اعلیٰ ترین ’’ریڈ الرٹ‘‘ جاری

اٹلی کی حکومت نے ملک میں شدید ترین گرمی کی لہر کے پیشِ نظر تمام بڑے شہروں کے لیے اعلیٰ ترین سطح کا ‘ریڈ الرٹ’ جاری کر دیا ہے۔ عالمی میڈیا رپورٹس کے مطابق وزارتِ صحت کی زیرِ نگرانی 27 بڑے شہروں میں یہ انتباہ نافذ کیا گیا ہے، جہاں درجہ حرارت مسلسل 35 ڈگری سیلسیس سے تجاوز کر رہا ہے۔ اٹلی کی حکومت کی جانب سے یہ اقدام اس وقت اٹھایا گیا جب شدید گرمی کے ساتھ ہوا میں نمی کے تناسب میں بھی ریکارڈ اضافہ دیکھا گیا۔ حکام کے مطابق ریڈ الرٹ کا مطلب ہے کہ گرمی کی یہ شدید لہر نہ صرف بزرگوں بلکہ عام اور صحت مند افراد اور جسمانی مشقت کرنے والے لوگوں کی صحت کے لیے بھی شدید خطرے کا باعث بن سکتی ہے۔