اسرائیل کے غزہ میں حملے جاری، مزید 4 فلسطینی شہید، 14 زخمی

غزہ میں اسرائیلی فوج کی جانب سے مسلسل جاری حملوں کے نتیجے میں مزید 4 فلسطینی شہید اور 14 زخمی ہو گئے ہیں۔ غزہ کی وزارتِ صحت کے مطابق گزشتہ 24 گھنٹوں کے دوران متعدد مقامات پر کی جانے والی بمباری سے شہادتیں واقع ہوئیں۔ وزارت نے بتایا کہ اب بھی کئی افراد کی لاشیں تباہ شدہ عمارتوں کے ملبے تلے اور سڑکوں پر موجود ہیں، تاہم مسلسل حملوں اور خطرات کے باعث ایمبولینسز اور سول ڈیفنس کی ٹیمیں امدادی کارروائیوں اور لاشوں کو نکالنے میں شدید مشکلات کا شکار ہیں۔

وزارتِ صحت کے فراہم کردہ اعداد و شمار کے مطابق 11 اکتوبر 2025 کے بعد سے اب تک 1,207 افراد شہید جبکہ 3,914 زخمی ہو چکے ہیں، اور اسی عرصے میں 803 لاشیں ملبے سے نکالی گئی ہیں۔ وزارت نے مزید تصدیق کی ہے کہ اکتوبر 2023 سے شروع ہونے والے ان شدید اسرائیلی حملوں کے باعث غزہ میں شہید ہونے والے فلسطینیوں کی مجموعی تعداد 73 ہزار 333 تک پہنچ گئی ہے۔