درجنوں یہودی آباد کاروں کا مسجد اقصیٰ پر دھاوا، صحن میں تلمودی رسوم ادا کیں

مرکز اطلاعات فلسطین کے مطابق دسیوں یہودی آباد کاروں نے اسرائیلی فوج کی کڑی نگرانی میں باب المغاربہ کے راستے مسجد اقصیٰ کے صحن میں زبردستی داخل ہو کر مذہبی رسومات ادا کیں۔ رپورٹ کے مطابق 176 آباد کاروں نے قبلہ اول کے صحنوں میں تلمودی رسوم کے دوران رقص و سرود کیا اور زمین پر لیٹ کر اپنے مذہبی طریقے بجا لائے۔ اس موقع پر قابض اسرائیلی فوج نے فلسطینیوں کی آمد پر سخت پابندیاں عائد کرتے ہوئے سینکڑوں شہریوں کو مسجد میں داخل ہونے سے روک دیا۔ واضح رہے کہ گزشتہ ہفتے بھی اسرائیلی وزراء اور پارلیمانی اراکین سمیت 5 ہزار 411 یہودی آباد کاروں نے ‘ہیکل کی بربادی’ کی مناسبت سے مسجد اقصیٰ کی حرمت کو پامال کیا تھا، جس کے بعد آئندہ ستمبر سے اکتوبر کے یہودی تہواروں کے دوران ان دھاووں میں مزید شدت آنے کا خدشہ ظاہر کیا جا رہا ہے۔