اسرائیلی آبادکاروں کا مسجدِ اقصیٰ کے احاطے میں داخلہ، فلسطینی حکام کا شدید احتجاج

فلسطین کے گورنریٹ برائے القدس کے مطابق یہودی مذہبی دن “تشا بِآو” کے آغاز سے اب تک 2300 سے زائد اسرائیلی آبادکار مسجدِ اقصیٰ کے احاطے میں داخل ہو چکے ہیں۔ فلسطینی حکام کے مطابق اسرائیلی پولیس نے تقریباً 150، 150 افراد کے گروہوں کی صورت میں آبادکاروں کو مسجد کے احاطے میں جانے کی اجازت دی، جہاں انہوں نے تفلین باندھے، مشرقی حصے میں سجدے کیے اور بلند آواز میں مذہبی نغمے گائے۔ واضح رہے کہ “تشا بِآو” 70 عیسوی میں رومیوں کے ہاتھوں قدیم ہیکل (معبد) کی تباہی کی یاد میں منایا جانے والا یومِ سوگ ہے۔

دوسری جانب، کئی دہائیوں سے قائم اسٹیٹس کو کے تحت مسجدِ اقصیٰ میں صرف مسلمانوں کو عبادت کی اجازت ہے، لیکن اسرائیلی فورسز نے مقبوضہ مشرقی یروشلم کے قدیم شہر (اولڈ سٹی) اور مسجد کے دروازوں پر سخت پابندیاں عائد کر کے بیشتر فلسطینی نمازیوں کو داخلے سے روک دیا ہے۔ گورنریٹ کا کہنا ہے کہ صرف چند فلسطینی ہی فجر کی نماز ادا کرنے میں کامیاب ہو سکے، جن میں سے بعض کو بعد میں اسرائیلی فورسز کی جانب سے مبینہ طور پر تشدد کا نشانہ بھی بنایا گیا۔ مسجدِ اقصیٰ اسلام کا تیسرا مقدس ترین مقام اور فلسطینی قومی شناخت کی اہم علامت ہے۔