اسرائیل کے جنونی وزیر کا غزہ میں روزانہ 30 سے 40 افراد قتل کرنے کا مطالبہ

اسرائیل کے انتہائی دائیں بازو کے رہنما اور وزیرِ قومی سلامتی اتمار بن گویر نے غزہ میں روزانہ 30 سے 40 افراد کو قتل کرنے اور فلسطینیوں کی بڑے پیمانے پر بے دخلی کی کھلم کھلا وکالت کی ہے۔ سابق اسرائیلی یرغمالی کے پوڈکاسٹ میں گفتگو کرتے ہوئے بن گویر نے غزہ میں حملوں میں کمی پر وزیراعظم بنیامین نیتن یاہو سے شدید اختلاف ظاہر کیا اور کہا کہ صرف فوری خطرہ بننے والوں کو ہی نہیں بلکہ ان افراد کو بھی نشانہ بنایا جائے جنہیں وہ زندگی کے لائق نہیں سمجھتے۔ اگرچہ بن گویر کے پاس اسرائیلی فوج کو براہِ راست احکامات دینے کا اختیار نہیں ہے، لیکن وہ پولیس اور جیلوں کے نگران اور نیتن یاہو حکومت کے بااثر اتحادی ہیں۔ ان کے اس بیان کو عالمی سطح پر شدید تنقید کا نشانہ بنایا جا رہا ہے، جبکہ ماضی میں بھی ان کے ایسے بیانات کو عالمی عدالتِ انصاف میں نسل کشی کے ارادوں کے شواہد کے طور پر پیش کیا جا چکا ہے۔