مقبوضہ مغربی کنارے میں اسرائیلی فورسز کی صحافیوں پر آنسو گیس کی شیلنگ

مقبوضہ مغربی کنارے میں اسرائیلی فورسز کی بربریت کا سلسلہ جاری ہے، جہاں انہوں نے خبروں کی کوریج کرنے والے صحافیوں اور نہتے شہریوں پر آنسو گیس کی شدید شیلنگ کر دی۔ فلسطینی خبر رساں ادارے ‘وفا’ کے مطابق یہ واقعہ نابلس کے جنوب مغرب میں واقع قصبے صرہ میں اس وقت پیش آیا جب مسلح اسرائیلی آبادکاروں نے قصبے پر حملے اور داخلے کی کوشش کی، جسے مقامی فلسطینیوں نے دلیری سے مزاحمت کرتے ہوئے ناکام بنا دیا۔

آبادکاروں کو ناکامی کا سامنا ہونے پر اسرائیلی فورسز نے قصبے کا محاصرہ کر کے چھاپہ مارا اور بلا اشتعال آنسو گیس کے گولے فائر کیے۔ اس شیلنگ کے نتیجے میں متعدد فلسطینیوں سمیت موقع پر موجود صحافیوں کی حالت غیر ہو گئی اور انہیں سانس لینے میں شدید مشکلات اور دیگر طبی مسائل کا سامنا کرنا پڑا۔