اسرائیل کے غزہ میں فضائی حملے، مزید 2 فلسطینی شہید، کئی مکان تباہ

غزہ شہر اور اس کے اطراف میں اسرائیلی افواج کی شدید فضائی کارروائیوں کا سلسلہ جاری ہے، جس کے نتیجے میں کم از کم دو افراد شہید اور متعدد زخمی ہو گئے ہیں۔ ذرائع کے مطابق اسرائیلی طیاروں نے غزہ شہر کی الجلا اسٹریٹ پر واقع ایک رہائشی مکان کو نشانہ بنایا، جہاں الشفا ہسپتال انتظامیہ نے دو افراد کی شہادت کی تصدیق کر دی ہے۔ علاوہ ازیں، جبالیہ اور البریج پناہ گزین کیمپوں کے ساتھ ساتھ غزہ شہر کے علاقوں الزیتون اور تل الہویٰ میں بھی بمباری سے متعدد مکانات زمین بوس ہو گئے۔ جنوب مشرقی علاقے الزیتون میں ایک عمارت کو نشانہ بنائے جانے سے کئی شہری شدید زخمی ہوئے، جنہیں فوری طبی امداد کے لیے قریبی ہسپتالوں میں منتقل کر دیا گیا ہے۔