اسرائیلی فوج کا غزہ میں مکان پر فضائی حملہ، فلسطینی میاں بیوی 4 بچوں سمیت شہید

اسرائیلی فوج نے جنگ بندی کی معاہدے کی سنگین خلاف ورزیاں جاری رکھتے ہوئے غزہ کے علاقے حی الصبرہ میں ایک رہائشی مکان پر فجر کے وقت فضائی حملہ کیا، جس کے نتیجے میں ایک ہی خاندان کے میاں بیوی اور ان کے چار معصوم بچوں سمیت 6 افراد شہید ہو گئے۔ شہدا میں فراس احمد المصري، ان کی اہلیہ سلسبيل اور بچے نعيم، فريال، سلمىٰ اور اميرہ شامل ہیں۔ حملے کے بعد مکان میں لگنے والی ہولناک آگ پر فائرفائٹنگ ٹیموں نے بمشکل قابو پایا۔ اس کے علاوہ خان یونس کے علاقوں میں اسرائیلی توپ خانے کی گولہ باری اور فائرنگ کے واقعات پیش آئے، جبکہ شمالی غزہ کے جبالیا کیمپ میں ڈرون حملے سے مزید چار افراد شہید ہوئے۔ فلسطینی وزارتِ صحت کے مطابق جنگ بندی کے بعد سے اب تک اسرائیلی کارروائیوں میں 1,169 فلسطینی شہید ہو چکے ہیں۔