اسلام آباد کے غیر قانونی کال سینٹرز میں غیر اخلاقی سرگرمیاں: 61 غیر ملکی ملک بدر، بلیک لسٹ میں شامل

اسلام آباد: وفاقی دارالحکومت میں غیر قانونی طور پر قائم کال سینٹرز کے نام پر غیر اخلاقی اور مشکوک سرگرمیوں میں ملوث ہونے کے الزام میں گرفتار مزید 61 غیر ملکی شہریوں کو باقاعدہ ملک بدر کر دیا گیا ہے۔

ذرائع کے مطابق ملک بدر کیے گئے افراد میں ویتنام کے 36 شہری، چین کے 24 اور ملائیشیا کا 1 شہری شامل ہے۔ یہ تمام غیر ملکی اسلام آباد میں کال سینٹرز کی آڑ میں مختلف نوعیت کی غیر اخلاقی و غیر قانونی سرگرمیوں میں ملوث پائے گئے تھے، جس کے بعد سیکیورٹی اور قانون نافذ کرنے والے اداروں نے کریک ڈاؤن کرتے ہوئے انہیں گرفتار کیا تھا۔

وزارتِ داخلہ نے کارروائی کرتے ہوئے تمام گرفتار ملزمان کے ویزے فوری طور پر منسوخ کر دیے تھے اور ان کی واپسی کے لیے خصوصی ایگزٹ پرمٹ جاری کیے تھے۔ ذرائع کا مزید کہنا ہے کہ ڈی پورٹ کیے گئے تمام 61 غیر ملکیوں کے نام قومی بلیک لسٹ (Blacklist) میں شامل کر دیے گئے ہیں، جس کے باعث یہ افراد مستقبل میں دوبارہ کبھی بھی پاکستان سفر نہیں کر سکیں گے۔