ارشد چائے والا کے پاسپورٹ کی عدم تجدید کا معاملہ: اسلام آباد ہائیکورٹ کا وفاق اور ڈی جی امیگریشن کو نوٹس جاری

اسلام آباد ہائیکورٹ کے جسٹس عمیر مجید ملک نے معروف انٹرپرینیور ارشد خان (المعروف ارشد چائے والا) کے پاسپورٹ کی تجدید نہ ہونے کے خلاف دائر درخواست پر سماعت کی۔ دورانِ سماعت درخواست گزار کے وکیل نے موقف اختیار کیا کہ ارشد خان ایک معروف کاروباری شخصیت ہیں جنہوں نے عالمی سطح پر پاکستانی ثقافت کو فروغ دیا ہے۔ نادرا کے ویریفکیشن بورڈ نے ان کا شناختی کارڈ کلیئر کر دیا تھا اور اس وقت ان کا شناختی کارڈ مکمل طور پر فعال ہے۔

وکیل نے عدالت کو بتایا کہ ارشد خان نے 20 اگست 2025 کو پاسپورٹ کی تجدید کے لیے اپلائی کیا تھا، تاہم ایک سال کا طویل عرصہ گزرنے کے باوجود انہیں پاسپورٹ جاری نہیں کیا گیا۔ انہوں نے سیکرٹری داخلہ کے دفتر سے متعدد بار رجوع کرنے کے ساتھ ساتھ لیگل نوٹس بھی بھیجا، مگر کوئی داد رسی نہ ہوئی۔ وکیل نے استدعا کی کہ عدالت ارشد خان کو تجدید شدہ پاسپورٹ فوری جاری کرنے کا حکم دے۔ جسٹس عمیر مجید ملک نے ریمارکس دیے کہ پہلے فریقین سے کمنٹس طلب کر لیتے ہیں پھر آگے دیکھتے ہیں۔ عدالت نے وفاق (بذریعہ سیکرٹری داخلہ) اور ڈی جی امیگریشن اینڈ پاسپورٹ کو نوٹسز جاری کرتے ہوئے جواب طلب کر لیا۔