اسحاق ڈار کا ایرانی وزیر خارجہ سے رابطہ، علاقائی صورتحال پر اہم تبادلہ خیال

پاکستان کے نائب وزیراعظم و وزیر خارجہ سینیٹر محمد اسحاق ڈار نے ایران کے وزیر خارجہ سید عباس عراقچی سے ایک اہم ٹیلی فونک رابطہ کیا ہے، جس میں خطے کی بدلتی ہوئی سیکیورٹی صورتحال اور عالمی امور پر تفصیلی گفتگو کی گئی۔

گفتگو کے دوران دونوں رہنماؤں نے مشرقِ وسطیٰ میں پیش آنے والی پیشرفت، خطے میں پائیدار امن و استحکام کے قیام اور ممکنہ تناؤ کو کم کرنے کے لیے جاری سفارتی کوششوں پر خیالات کا تبادلہ کیا۔ اس موقع پر نائب وزیراعظم اسحاق ڈار نے پاکستان، سعودی عرب اور ترکیہ کے درمیان حال ہی میں طے پانے والے اہم ‘مکہ مشترکہ دفاعی معاہدے’ (Makkah Joint Defence Agreement) کی تفزیلات سے ایرانی وزیر خارجہ کو بریف کیا۔ اسحاق ڈار نے واضح کیا کہ اس سہ فریقی معاہدے کا بنیادی مقصد تینوں مسلم ممالک کے درمیان اسٹریٹجک اور دفاعی تعاون کو مضبوط بنانا، باہمی دفاعی صلاحیتوں کو فروغ دینا اور خطے میں امن، سلامتی اور اجتماعی تحفظ کو یقینی بنانا ہے۔

ایرانی وزیر خارجہ عباس عراقچی نے مکہ معاہدے کے اہم نکات اور تفصیلات سے آراستہ کرنے اور اعتماد میں لینے پر نائب وزیراعظم اسحاق ڈار کا شکریہ ادا کیا۔ دونوں وزرائے خارجہ نے علاقائی پیشرفت اور باہمی دلچسپی کے تمام اہم معاملات پر ایک دوسرے کے ساتھ قریبی رابطہ اور مسلسل مشاورت برقرار رکھنے پر اتفاق کیا۔