پاکستان اور سعودی عرب کا خطے کی ابھرتی صورتحال پر گہری تشویش کا اظہار

نائب وزیراعظم اور وزیر خارجہ سینیٹر اسحاق ڈار اور سعودی عرب کے وزیر خارجہ شہزادہ فیصل بن فرحان آل سعود کے درمیان ٹیلی فون پر اہم رابطہ ہوا ہے، جس میں دونوں رہنماؤں نے جنگ بندی معاہدے کے باوجود خطے میں ابھرنے والی حالیہ صورتحال پر گہری تشویش کا اظہار کیا ہے۔

ترجمان دفترِ خارجہ کی جانب سے جاری کردہ بیان کے مطابق، گفتگو کے دوران نائب وزیراعظم اسحاق ڈار نے سعودی عرب میں ہیلی کاپٹر کے حالیہ حادثے میں 14 قیمتی جانوں کے ضیاع پر گہرے دکھ اور افسوس کا اظہار کیا۔ انہوں نے صدرِ مملکت، وزیراعظم شہباز شریف، آرمی چیف جنرل عاصم منیر، حکومتِ پاکستان اور عوام کی جانب سے سعودی قیادت اور عوام سے تعزیت کا اظہار کیا۔ اس موقع پر سعودی وزیر خارجہ نے پاکستان کے اس برادرانہ رویے کو سراہتے ہوئے نائب وزیراعظم کا شکریہ ادا کیا۔