اسحاق ڈار کا پاکستان کی آبی سلامتی، قانونی، سفارتی اور تکنیکی امور کا جائزہ

نائب وزیراعظم و وزیر خارجہ سینیٹر محمد اسحاق ڈار کی زیر صدارت ایک اعلیٰ سطحی اجلاس منعقد ہوا، جس میں پاکستان کی قومی آبی سلامتی، پانی کی تقسیم اور اس سے منسلک دیگر اہم اسٹریٹجک امور کا تفصیلی جائزہ لیا گیا۔

ترجمان دفتر خارجہ کے مطابق اجلاس میں قومی آبی سلامتی سے متعلق تمام قانونی، سفارتی اور تکنیکی پہلوؤں کا جامع احاطہ کیا گیا اور ملک کے آبی حقوق کے تحفظ کے لیے مختلف اقدامات پر غور کیا گیا۔ اس موقع پر نائب وزیراعظم اسحاق ڈار نے پاکستان کے خودمختار حقوق کے تحفظ کے غیر متزلزل عزم کا اعادہ کرتے ہوئے ہدایت کی کہ قومی مفادات کی نگہبانی اور بین الاقوامی سطح پر پاکستان کے مؤقف کو مؤثر انداز میں پیش کرنے کے لیے تمام متعلقہ وزارتیں اور ادارے آپس میں قریبی رابطہ اور مکمل ہم آہنگی برقرار رکھیں۔

اس اعلیٰ سطحی اجلاس میں وفاقی وزیر برائے آبی وسائل، وفاقی وزیر برائے اطلاعات و نشریات اور تمام متعلقہ وفاقی سیکرٹریز سمیت تکنیکی و قانونی ماہرین نے بھی شرکت کی اور اپنی تجاویز پیش کیں۔