اسحاق ڈار اور سعودی وزیر خارجہ کے درمیان ٹیلیفونک رابطہ، باہمی دلچسپی کے امور پر تبادلہ خیال

پاکستان کے نائب وزیراعظم و وزیر خارجہ سینیٹر اسحاق ڈار اور سعودی عرب کے وزیر خارجہ شہزادہ فیصل بن فرحان کے درمیان ایک اہم ٹیلی فونک رابطہ ہوا ہے، جس میں دوطرفہ تعلقات اور علاقائی امور پر تفصیل سے بات چیت کی گئی۔

ترجمان دفتر خارجہ کی جانب سے جاری کردہ بیان کے مطابق دونوں رہنماؤں کے درمیان ہونے والی اس گفتگو میں باہمی دلچسپی کے اہم امور پر تبادلہ خیال کیا گیا۔ اس کے علاوہ کثیرالجہتی تعاون کے فروغ اور خطے کی موجودہ مجموعی صورتحال پر بھی غور کیا گیا۔

ٹیلی فونک گفتگو کے دوران دونوں وزرائے خارجہ نے پاکستان اور سعودی عرب کے درمیان دوطرفہ سطح کے ساتھ ساتھ بین الاقوامی اور کثیرالجہتی فورمز پر بھی مسلسل قریبی رابطے قائم رکھنے، مشاورت اور باہمی تعاون کو مزید مضبوط بنانے کی اہمیت پر زور دیا۔ دونوں رہنماؤں نے تمام شعبوں میں پاک-سعودی برادرانہ تعلقات کو مزید آگے بڑھانے کے عزم کا اعادہ کیا۔