اردن کے عوام اپنی سرزمین سے امریکی اڈوں کے خاتمے کا مطالبہ کریں: پاسداران انقلاب

ایران کے پاسدارانِ انقلاب (آئی آر جی سی) نے اردن کے عوام کے نام ایک خصوصی پیغام جاری کرتے ہوئے ان سے مطالبہ کیا ہے کہ وہ اپنی سرزمین سے امریکی فوجی اڈوں کے خاتمے کے لیے آواز بلند کریں۔ پاسدارانِ انقلاب کے مطابق، ایران نے اردن میں قائم اس امریکی فضائی اڈے کو نشانہ بنایا ہے جہاں سے ایران پر حملے کیے گئے تھے اور امریکی جارحیت کے پہلے ہی روز انہی اڈوں سے ہونے والے حملوں میں میناب کے مقام پر 186 بچوں اور اساتذہ کو شہید کیا گیا تھا۔ بیان میں واضح کیا گیا ہے کہ ایران کی کارروائی صرف امریکی افواج کے خلاف تھی، کیونکہ ایران کو اردن یا اس کے عوام سے کوئی دشمنی نہیں ہے اور وہ ان کا بے حد احترام کرتا ہے۔ ایرانی فورسز نے کہا کہ اردن کے عوام فلسطینیوں کے دکھ کو بہتر سمجھتے ہیں اور غزہ میں امریکی سرپرستی میں ہونے والے صیہونی جرائم سے بخوبی واقف ہیں، لہٰذا امریکی اڈوں کی بیدخلی کا مطالبہ ہی فلسطینیوں کی حقیقی مدد اور خطے میں پائیدار امن کی بحالی کا ضامن بنے گا۔