آبنائے ہرمز پر ہمارا مکمل کنٹرول، امریکی اعلانات حقیقت نہیں: ایرانی کمانڈر

ایران کی پاسدارانِ انقلاب کی بحریہ (IRGC Navy) کے کمانڈر ریئر ایڈمرل علی عظمائی نے دعویٰ کیا ہے کہ حکمتِ عملی کے اعتبار سے اہم ترین آبی گزرگاہ ‘آبنائے ہرمز’ مکمل طور پر بند ہے اور اس کے ذریعے ہونے والی تمام تر بحری نقل و حرکت پر ایران کا پورا کنٹرول قائم ہے۔ تسنیم نیوز ایجنسی سے گفتگو کرتے ہوئے انہوں نے کہا کہ آبنائے ہرمز میں ہونے والی کوئی بھی کارروائی پاسدارانِ انقلاب کی نظروں سے اوجھل نہیں ہو سکتی، اور اصل حقیقت کو امریکی حکام کے زبانی بیانات کی بجائے زمین پر موجود صورتِ حال سے دیکھنا چاہیے۔ واضح رہے کہ امریکا اس سے قبل آبنائے ہرمز پر کنٹرول اور اسے کھلی گزرگاہ قرار دینے کا دعویٰ کرتا رہا ہے، جبکہ ایران کا مؤقف ہے کہ اس کی واضح اجازت کے بغیر کوئی بھی جہاز یہاں سے گزر نہیں سکتا۔

دوسری جانب ایرانی پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی نے دعویٰ کیا ہے کہ ایران کے خلاف کی جانے والی ایک مجوزہ زمینی کارروائی کی سازش کو ابتدا ہی میں ناکام بنا دیا گیا ہے۔ ان کا کہنا تھا کہ ایرانی فوجی یونٹس نے مقامی فورسز کی مدد سے مختلف سمتوں سے ہونے والے اس منصوبہ بند زمینی حملے کو پسپا کر دیا ہے۔ ابراہیم عزیزی نے عزم ظاہر کیا کہ امریکا کو اس وقت تک نہیں بخشا جائے گا جب تک اسے مکمل طور پر شکست نہیں ہو جاتی اور ایران اپنے مقاصد کی تکمیل تک امریکا کا پیچھا کرتا رہے گا۔