حالیہ ایرانی حملوں میں 200 سے زائد امریکی فوجی ہلاک ہوئے، ترجمان پاسداران انقلاب

ایران کی سپاہِ پاسدارانِ انقلاب نے دعویٰ کیا ہے کہ اسلام آباد مفاہمتی یادداشت کی خلاف ورزی کے بعد سے جاری ایرانی جوابی حملوں میں 200 سے زائد امریکی فوجی ہلاک اور اس سے بھی کہیں زیادہ زخمی ہو چکے ہیں۔ ایرانی خبر ایجنسی کو دیے گئے انٹرویو میں ترجمان جنرل حسین محبی نے امریکی ہلاکتوں کے حوالے سے واشنگٹن کے جاری کردہ اعداد و شمار کو سراسر جھوٹ قرار دیتے ہوئے کہا کہ امریکی حکومت کو چاہیے کہ وہ صحافیوں کو تباہ شدہ مراکز کا دورہ کروائے تاکہ دنیا خود سچ دیکھ سکے۔

جنرل حسین محبی کا کہنا تھا کہ ایرانی حملوں میں خطے میں قائم امریکا کے 8 فوجی مراکز اور ایک مقام پر موجود 20 حفاظتی شیلٹرز کو تباہ کیا جا چکا ہے۔ اس سے قبل ترجمان نے یہ دعویٰ بھی کیا تھا کہ پاسدارانِ انقلاب نے دو ہفتوں کے دوران امریکی اڈوں پر حملے کر کے 11 جنگی طیارے اور ہیلی کاپٹر، 17 ڈرونز، ایک F-15، ایک P-8، ایک C-17 ٹرانسپورٹ طیارہ اور 8 ری فیولنگ ایئر کرافٹ تباہ کر دیے ہیں۔