بحری ناکہ بندی کا منصوبہ الٹا امریکا کیلئے نقصان دہ ثابت ہوا: محمد باقر قالیباف

ایران کی پارلیمنٹ کے سپیکر محمد باقر قالیباف نے آبنائے ہرمز پر تہران کا کنٹرول کمزور کرنے کے لیے بنائی گئی امریکی فوجی حکمت عملی کا شدید تمسخر اڑایا ہے۔ سوشل میڈیا پلیٹ فارم ایکس (ٹویٹر) پر اپنے ایک بیان میں انہوں نے کہا کہ امریکہ ایران کو سزا دینے کا ارادہ رکھتا تھا، لیکن اس کے اپنے ہی اقدامات الٹا اسی کے لیے نقصان دہ ثابت ہوئے اور انہیں اب تین ہندسوں میں پہنچنے والی تیل کی بلند قیمتوں کا سامنا کرنا پڑ رہا ہے۔ انہوں نے امریکی منصوبے پر طنز کرتے ہوئے اسے ان کی ناکام “ٹین بائی ٹین” حکمت عملی قرار دیا۔

واضح رہے کہ ایران کے خلاف امریکہ اور اسرائیل کی جاری کشیدگی کے باعث عالمی توانائی کی منڈی شدید دباؤ کا شکار ہو چکی ہے، جس سے توانائی کے ایک نئے عالمی بحران کا خطرہ منڈلا رہا ہے۔ محمد باقر قالیباف نے عالمی معاشی صورتحال کی جانب اشارہ کرتے ہوئے مزید کہا کہ اس بحران کے نتیجے میں رواں ماہ کے آغاز میں بین الاقوامی مالیاتی فنڈ (IMF) نے بھی عالمی اقتصادی ترقی کی پیش گوئی میں کمی کر دی ہے، جو غلط امریکی پالیسیوں کا براہ راست نتیجہ ہے۔