پابندیاں جاری رہیں تو ایران میں مہنگائی مزید بڑھ سکتی ہے: صدر مسعود پزشکیان

ایرانی صدر مسعود پزشکیان نے کہا ہے کہ اگر بین الاقوامی پابندیاں یوں ہی جاری رہیں تو ایران میں مہنگائی کی شرح میں مزید اضافہ ہو سکتا ہے۔ میڈیا سے گفتگو کرتے ہوئے انہوں نے پابندیوں کے منفی اثرات کا انکار کرنے والوں پر طنز کیا اور انکشاف کیا کہ پابندیوں کے باعث ایرانی برآمدات میں 25 سے 35 فیصد تک کمی واقع ہوئی ہے، جبکہ درآمدات میں اس سے بھی زیادہ گراوٹ دیکھی گئی ہے۔ مسعود پزشکیان کا کہنا تھا کہ معاشی حقائق کو سمجھنے والے لوگ پابندیوں کی سنگینی سے بخوبی واقف ہیں۔ اس سے قبل اپنے ایک بیان میں ایرانی صدر نے واضح کیا تھا کہ ایران خطے میں امن اور استحکام چاہتا ہے اور کسی جنگ کا خواہاں نہیں، تاہم کسی بھی طاقت کے سامنے ہتھیار نہیں ڈالے گا اور ہر جارح کا پوری قوت سے مقابلہ کرے گا۔