ہمارے مفادات اور تقدیریں پہلے سے زیادہ جڑی ہیں: ایرانی صدر کا یوم آزادی پر پیغام

ایران کے صدر مسعود پزشکیان نے پاکستان کے یومِ آزادی کے موقع پر پاکستانی قوم اور قيادت کو مبارکباد پیش کرتے ہوئے کہا ہے کہ ایران اور پاکستان کے مشترکہ مفادات اور تقدیریں پہلے سے کہیں زیادہ ایک دوسرے سے جڑی ہوئی ہیں۔ اپنے خصوصی بیان میں ایرانی صدر نے پاکستان کے یومِ آزادی کو ایک قیمتی موقع قرار دیا اور کہا کہ یہ دن نہ صرف پاکستانی قوم کی تاریخی کامیابیوں کو خراجِ تحسین پیش کرنے کا موقع ہے بلکہ دونوں برادر ممالک کے دیرینہ اور تزویراتی (اسٹریٹجک) تعلقات کو مزید گہرا اور وسعت دینے کے لیے ایک نیا سنگِ میل بھی ہے۔

ایرانی صدر نے اس عزم کو دہرایا کہ تہران اسلام آباد کے ساتھ اپنے تمام شعبوں میں جامع اور بنیادی تعلقات کو مزید مضبوط بنانے کی پالیسی پر سختی سے قائم ہے۔ انہوں نے کہا کہ باہمی اعتماد، احترام اور دونوں ممالک میں موجود وسیع صلاحیتوں سے فائدہ اٹھاتے ہوئے دوطرفہ تعاون کے فروغ کے لیے مزید مؤثر اقدامات کیے جائیں گے۔ مسعود پزشکیان کے مطابق خطے کی موجودہ صورتِ حال کے پیشِ نظر دونوں ممالک کے درمیان بہتر ہم آہنگی کی ضرورت پہلے سے کہیں زیادہ بڑھ گئی ہے۔ انہوں نے پاکستان کی ترقی، خوشحالی، پائیدار سربلندی اور پاک ایران برادرانہ تعلقات کی مزید استحکام کے لیے نیک تمناؤں اور دعاؤں کا اظہار کیا۔