ایرانی عدالت نے اسرائیلی اور امریکی مفادات کیلئےکام کرنےکے الزام میں خاتون صحافی کو 15 سال قید کی سزا سنادی

انٹرنیشنل فیڈریشن آف جرنلسٹس (IFJ) کے مطابق تہران کی ایک مقامی عدالت نے معروف اور ایوارڈ یافتہ ایرانی فوٹو جرنلسٹ یلدا معیری کو ان کی عدم موجودگی میں 15 سال قید کی سخت سزا سنا دی ہے۔ عالمی صحافتی تنظیم کے مطابق یلدا معیری پر صیہونی حکومت (اسرائیل) اور امریکہ کے مفادات کے لیے کام کرنے اور ریاست مخالف سرگرمیوں میں ملوث ہونے کا الزام عائد کیا گیا تھا۔ ان کے خلاف یہ تمام الزامات ان کی صحافتی خدمات اور آن لائن شائع کردہ مواد کی بنیاد پر لگائے گئے ہیں۔

دوسری جانب، سزا سنائے جانے کے بعد فوٹو جرنلسٹ یلدا معیری نے اپنے ایک بیان میں کہا ہے کہ وہ اس عدالتی کارروائی اور سماعت میں اس لیے شریک نہ ہو سکیں کیونکہ انہیں عدالت کی طرف سے اس پیشی کے بارے میں کوئی رسمی اطلاع ہی نہیں دی گئی تھی۔ انہوں نے سزا کے اس فیصلے پر شدید تشویش اور حیرت کا اظہار کیا ہے۔

واضح رہے کہ یلدا معیری کو اس سے قبل ستمبر 2022 میں بھی اس وقت گرفتار کیا گیا تھا جب وہ 22 سالہ مہسا امینی کی پولیس حراست میں ہلاکت کے بعد ایران بھر میں پھوٹنے والے شدید احتجاجی مظاہروں کی کوریج کر رہی تھیں۔ اس وقت بھی وہ تقریباً تین ماہ تک قید میں رہیں جس کے بعد انہیں ضمانت پر رہا کیا گیا تھا۔ عالمی صحافتی تنظیموں نے ان کی سزا کی مذمت کرتے ہوئے اسے صحافت پر قدغن قرار دیا ہے۔