ایرانی عدلیہ نے ٹرمپ کا امریکی قیدی کی رہائی کا دعویٰ مسترد کر دیا

ایران کی عدلیہ نے امریکی صدر ڈونلڈ ٹرمپ کے اس دعوے کو یکسر مسترد اور سچائی سے عاری قرار دے دیا ہے جس میں انہوں نے تہران کی جانب سے ایک امریکی قیدی کو رہا کرنے کا دعویٰ کیا تھا۔ ایرانی سرکاری خبر رساں ادارے ’آئی آر آئی بی‘ (IRIB) کے مطابق، ایرانی عدلیہ کے ایک نامعلوم باوثوق ذریعے نے واضح کیا ہے کہ امریکی صدر کے دعووں کے برعکس ایران کی کسی بھی جیل سے کسی امریکی قیدی کو رہا کیا گیا ہے اور نہ ہی اس وقت قیدیوں کا کوئی تبادلہ عمل میں لایا گیا ہے۔

واضح رہے کہ گزشتہ روز (بدھ کو) امریکی صدر ڈونلڈ ٹرمپ نے اپنے سوشل میڈیا پلیٹ فارم ’ٹروتھ سوشل‘ پر ایک پیغام شیئر کرتے ہوئے دعویٰ کیا تھا کہ ایران نے سال 2024ء میں جو بائیڈن انتظامیہ کے دورِ حکومت کے دوران گرفتار کیے گئے ایک امریکی قیدی کو رہا کر دیا ہے۔ تاہم، تہران نے اس دعوے کو فوری طور پر مسترد کرتے ہوئے اسے بے بنیاد قرار دیا ہے۔