ایران کسی بھی قیمت میں ابنائے ہرمز سے پیچھے نہیں ہٹے گا: آیت اللہ آملی لاریجانی

ایران کی ایکسپیڈیئنسی کونسل کے سربراہ اور سابق چیف جسٹس آیت اللہ آملی لاریجانی نے واضح کیا ہے کہ ایران کسی بھی قیمت پر آبنائے ہرمز پر اپنے موقف سے دستبردار نہیں ہوگا۔ ایرانی سرکاری نشریاتی ادارے کے مطابق کونسل کے اجلاس کے آغاز پر گفتگو کرتے ہوئے انہوں نے کہا کہ دشمن اس تزویراتی (اسٹریٹجک) آبی گزرگاہ کا محاصرہ کرنے اور ایران کو دباؤ میں لانے کی کوششیں کر رہے ہیں، تاہم اس پر مکمل خودمختاری صرف اسلامی جمہوریہ ایران کو حاصل ہے اور یہ شاہراہ اب جنگ سے پہلے والی سابقہ صورتحال پر واپس نہیں جائے گی۔

آیت اللہ آملی لاریجانی نے مزید کہا کہ اگر عالمی برادری اور دیگر ممالک آبنائے ہرمز سے آزادانہ تجارتی و بحری آمدورفت چاہتے ہیں تو انہیں ایران کی طے کردہ شرائط اور مفاہمتی یادداشتوں کی مکمل پاسداری کرنا ہوگی۔ انہوں نے امریکہ اور اسرائیل کے دباؤ کے خلاف ایرانی قوم اور مسلح افواج کی جدوجہد کو سراہتے ہوئے کہا کہ ایران اپنی خودمختاری اور دفاع پر کوئی سمجھوتہ نہیں کرے گا۔ یاد رہے کہ ایکسپیڈیئنسی کونسل سپریم لیڈر کی جانب سے مقرر کردہ ایران کا ایک انتہائی اہم اور بااثر آئینی و مشاورتی ادارہ ہے جو حکومت اور پارلیمان کے درمیان تنازعات کا حل بھی فراہم کرتا ہے۔