جوہری تنصیبات پر حملہ ہوا تو خطے میں امریکی اتحادیوں کے مفادات کو نشانہ بنائیں گے، ایران

ایران کی اعلیٰ مشترکہ عسکری کمان (خاتم الانبیا بریگیڈ) نے خبردار کیا ہے کہ اگر امریکا نے ایران کی جوہری تنصیبات پر حملہ کیا تو خطے میں امریکا اور اس کے اتحادیوں کے تمام مفادات کو نشانہ بنایا جائے گا۔ ایرانی میڈیا کے مطابق عسکری کمان نے واضح کیا کہ جوہری مراکز پر کسی بھی قسم کا حملہ خطے میں ایک وسیع جنگ کے پھیلاؤ کا باعث بنے گا۔ یہ انتباہ امریکی صدر ڈونلڈ ٹرمپ کے اس بیان کے بعد سامنے آیا ہے جس میں انہوں نے نطنز کے پہاڑوں میں قائم ایرانی ایٹمی مرکز پر جلد حملہ کرنے کی دھمکی دیتے ہوئے دعویٰ کیا تھا کہ ایرانی اس کارروائی کو روکنے کی صلاحیت نہیں رکھتے۔