ایران پر جتنا دباؤ بڑھے گا ردعمل بھی اتنا ہی سخت ہوگا: ایرانی صدر

تہران: ایران کے صدر مسعود پزشکیان نے خبردار کیا ہے کہ ایران پر جتنا زیادہ دباؤ ڈالا جائے گا اس کا ردعمل بھی اتنا ہی سخت ہوگا۔

ایرانی صدر نے اپنے بیان میں کہا کہ ایران دھونس، دھمکیوں، ناانصافی اور جارحیت کے سامنے کبھی نہیں جھکے گا۔

انہوں نے کہا کہ ایران اپنے دفاع اور خود مختاری کے تحفظ کے لیے ہر ممکن اقدام کرے گا اور دشمن کے عزائم کو ناکام بنا دے گا۔

مسعود پزشکیان کا کہنا تھا کہ دشمن جو خواب دیکھ رہا ہے ایران انہیں ڈراؤنے خواب بنا دے گا۔

ایرانی صدر نے مزید کہا کہ ایران خطے کے ممالک کے ساتھ دوستانہ اور مثبت تعلقات کا خواہاں ہے تاہم یہ خواہش کسی بھی صورت میں اپنے دفاع کے حق سے دستبرداری نہیں ہے۔

انہوں نے واضح کیا کہ حالیہ حملوں میں ایران نے ہمسایہ ممالک کو نشانہ نہیں بنایا بلکہ خطے میں موجود امریکی فوجی اڈوں اور تنصیبات کو ہدف بنایا۔

ایرانی صدر کے مطابق ان کارروائیوں کا مقصد خطے میں موجود امریکی فوجی ڈھانچے کو نشانہ بنانا تھا۔