ایران کا سعودی عرب یمن تنازع بات چیت سے حل کرنے کا مطالبہ

ایران کی وزارتِ خارجہ کے ترجمان اسماعیل بقائی نے سعودی عرب اور یمن کے درمیان حالیہ کشیدگی کو بات چیت کے ذریعے حل کرنے کا مطالبہ کرتے ہوئے کہا ہے کہ اس تنازع کا کوئی فوجی حل ممکن نہیں ہے۔ انہوں نے تاکید کی کہ طے شدہ روڈ میپ پر عمل اور مذاکرات کی طرف واپسی ہی یمنی عوام کی مشکلات کا واحد حل ہے، جبکہ خطے میں امریکی پالیسی یمن کی صورتحال کو مزید پیچیدہ کر رہی ہے۔ دوسری جانب ذرائع کے مطابق عمان میں حوثی ترجمان اور سعودی وفد کے درمیان اہم ملاقات ہوئی ہے جس میں علاقائی سلامتی اور استحکام پر گفتگو کی گئی۔

یہ پیشرفت ایک ایسے وقت میں سامنے آئی ہے جب حوثی تنظیم ‘انصار اللہ’ نے سعودی عرب کے شہروں جازان اور ینبع میں تیل کی تنصیبات پر ڈرون اور میزائل حملوں کا دعویٰ کرتے ہوئے ناکہ بندی کے جواب میں مزید سخت اقدامات کی دھمکی دی تھی۔ حوثیوں کے مطابق یہ حملے الحدیدہ پورٹ پر کی گئی کارروائی کے جواب میں کیے گئے۔ اگرچہ سعودی میڈیا نے ان حملوں کی تصدیق نہیں کی، تاہم یونانی ایئر فورس نے دعویٰ کیا ہے کہ انہوں نے یمن سے داغے گئے دو بیلسٹک میزائل اور ڈرون مار گرائے ہیں۔