سپریم لیڈر نے ایران کی مسلح افواج میں اعلیٰ فوجی کمانڈروں کی تقرریاں کردیں

ایران کے سپریم لیڈر مجتبیٰ خامنہ ای نے ملکی مسلح افواج کے اعلیٰ عہدوں پر کئی اہم اور سینئر فوجی کمانڈروں کی تقرریوں کا باقاعدہ حکم جاری کر دیا ہے۔

ایرانی میڈیا کے مطابق اعلیٰ عسکری کمانڈ میں کی جانے والی ان اہم تبدیلیوں کے تحت میجر جنرل علی عبداللہی کو مسلح افواج کا نیا چیف آف جنرل اسٹاف مقرر کیا گیا ہے، جبکہ امیر کیومر حیدری کو ان کا نائب یعنی ڈپٹی چیف آف جنرل اسٹاف کی ذمہ داری سونپی گئی ہے۔ اس کے علاوہ اسلامی انقلابی گارڈ کور (IRGC) کی کمان میں بھی بڑی تبدیلی کی گئی ہے اور میجر جنرل احمد واحدی کو آئی آر جی سی کا نیا کمانڈر ان چیف مقرر کر دیا گیا ہے۔

میڈیا رپورٹس میں مزید بتایا گیا ہے کہ میجر جنرل مصطفیٰ ایزدی کو آئی آر جی سی کا ڈپٹی کمانڈر جبکہ حجت الاسلام طیب کو عوامی رضاکار فورس ‘بسیج’ (Basij) تنظیم کا نیا سربراہ تعیّنات کیا گیا ہے۔

ایرانی ذرائع ابلاغ کے مطابق سپریم لیڈر کی جانب سے کی جانے والی یہ اہم اور وسیع پیمانے پر تقرریاں ملک کی عسکری قیادت، سیکیورٹی حکمتِ عملی اور دفاعی ڈھانچے میں نمایاں تبدیلی اور نئی صف بندی کی عکاسی کرتی ہیں۔