ایران میں فرانسیسی سفیر کی طلبی، اندرونی معاملات میں مداخلت پر شدید احتجاج

ایران نے اپنے اندرونی معاملات میں مبینہ مداخلت اور سفارتی حد سے تجاوز پر تہران میں تعینات فرانسیسی سفیر کو طلب کر کے شدید احتجاج ریکارڈ کرایا ہے۔ ایرانی وزارتِ خارجہ کے ترجمان اسماعیل بقائی کے مطابق فرانسیسی سفیر کو ان کے دو سفارت کاروں کی غیر قانونی سرگرمیوں پر طلب کیا گیا، جو سول سوسائٹی کے ساتھ روابط کے بہانے ایران کے داخلی امور میں مداخلت کر رہے تھے جو کہ ویانا کنونشن کی خلاف ورزی ہے۔ واضح رہے کہ 20 جولائی کو ایرانی سیکیورٹی فورسز نے ان دونوں فرانسیسی سفارت کاروں کو حراست میں لے کر کئی گھنٹے تفتیش کی تھی۔ فرانسیسی حکام اور وزیر خارجہ نے اس حراست پر سخت تشویش اور برہمی کا اظہار کیا تھا، تاہم ایران نے فرانس پر واضح کر دیا ہے کہ گمراہ کن عنوانات کے تحت مداخلت فوری بند کی جائے۔