امریکا جھوٹ کو صنعت بنا چکا، من گھڑت دعوے بطور ہتھیار استعمال کر رہا ہے: ایران

تہران: ایرانی وزارتِ خارجہ کے ترجمان اسماعیل بقائی نے امریکہ پر سخت تنقید کرتے ہوئے الزام عائد کیا ہے کہ واشنگٹن ایران کے خلاف من گھڑت الزامات کو بطور ہتھیار استعمال کر رہا ہے اور اسے انسانی جانوں کی کوئی قدر نہیں۔

تہران میں ہفتہ وار پریس بریفنگ کے دوران گفتگو کرتے ہوئے ترجمان ایرانی وزارتِ خارجہ اسماعیل بقائی کا کہنا تھا کہ امریکہ میں جھوٹ بولنا اب ایک مستقل صنعت بن چکا ہے اور واشنگٹن لالچ و تسلط کی پالیسی کا عادی ہو چکا ہے۔ انہوں نے کہا کہ امریکی حکام مذاکرات کے مفهوم کو احکامات مسلط کرنے (Dictation) کے مترادف سمجھتے ہیں، تاہم ایران کسی بھی صورت اس قسم کے آمرانہ اور نامناسب طرزِ عمل کو قبول نہیں کرے گا۔

اسماعیل بقائی نے خبردار کرتے ہوئے واضح کیا کہ ایرانی مسلح افواج ملک کی خودمختاری پر ہونے والی کسی بھی قسم کی جارحیت کا ہر بار بھرپور، سخت اور فوری جواب دیں گی۔ تہران کی سفارتی کوششوں کا ذکر کرتے ہوئے ترجمان نے بتایا کہ پاکستان خطے میں پاک-امریکہ-ایران کشیدگی کو کم کرنے کے لیے ایک ذمہ دارانہ اور اہم سفارتی کردار ادا کر رہا ہے، جبکہ دیگر دوست ممالک بھی ثالثی اور کشیدگی میں کمی کے لیے اپنی کوششیں جاری رکھے ہوئے ہیں۔