’سب کچھ یا پھر کچھ بھی نہیں‘، موجودہ جنگ کا اصول واضح ہے: باقر قالیباف

ایرانی پارلیمنٹ (مجلس) کے اسپیکر محمد باقر قالیباف نے امریکہ اور اس کے علاقائی اتحادیوں کو سخت ترین انتباہ جاری کرتے ہوئے واضح کیا ہے کہ موجودہ جنگ کا اصول بالکل سادہ اور واضح ہے: “سب کچھ یا پھر کچھ بھی نہیں”۔

سوشل میڈیا پلیٹ فارم پر جاری کردہ اپنے ایک تفصیلی بیان میں محمد باقر قالیباف نے کہا کہ اگر بحرانی صورتحال کی وجہ سے ایران خطے میں اپنا تیل فروخت نہیں کر سکتا تو پھر خطے کا کوئی بھی دوسرا ملک اپنا تیل فروخت نہیں کر سکے گا۔ انہوں نے مزید خبردار کرتے ہوئے کہا کہ اگر ایران کی قومی سلامتی محفوظ نہ رہی، تو پھر خطے کے کسی بھی ملک کا بنیادی اور شہری ڈھانچہ محفوظ نہیں رہے گا۔

ایرانی اسپیکر کا کہنا تھا کہ آبنائے ہرمز جیسے اہم اور حساس سمندری راستے کی سلامتی امریکی افواج کی خطے میں موجودگی کے بغیر بھی باحسن وخوبی یقینی بنائی جا سکتی ہے۔ محمد باقر قالیباف نے زور دے کر کہا کہ ایران پہلے ہی امریکی اور بین الاقوامی قیادت پر واضح کر چکا ہے کہ آبنائے ہرمز کی صورتحال اب جنگ سے پہلے جیسی ہرگز نہیں رہے گی اور ایران اپنی خودمختاری کا ہر قیمت پر دفاع کرے گا۔