پیپلزپارٹی نے سعد رفیق کا بیان غیر ذمہ دارانہ، قومی یکجہتی کیخلاف قرار دیدیا

پاکستان پیپلز پارٹی (PPP) نے مسلم لیگ (ن) کے رہنما خواجہ سعد رفیق کی جانب سے سانحہ سقوطِ ڈھاکہ سے متعلق دی گئے حالیہ بیان کو انتہائی غیر ذمہ دارانہ، تاریخی حقائق کو مسخ کرنے کی کوشش اور قومی یکجہتی کے اصولوں کے خلاف قرار دیا ہے۔

سندھ کے سینئر صوبائی وزیر شرجیل انعام میمن نے خواجہ سعد رفیق کے بیان پر سخت ردِعمل کا اظہار کرتے ہوئے کہا ہے کہ ن لیگ کے رہنما شدید سیاسی دیوالیہ پن اور اخلاقی افلاس کا شکار ہو چکے ہیں۔ انہوں نے کہا کہ طنزیہ جملوں اور بے بنیاد الزامات سے نہ تو واقعی تاریخ کو بدلا جا سکتا ہے اور نہ ہی شعور رکھنے والے عوام کی رائے کو گمراہ کیا جا سکتا ہے۔

شرجیل میمن کا کہنا تھا کہ سقوطِ ڈھاکہ پاکستان کی قومی تاریخ کا ایک انتہائی المناک اور حزن و ملال سے بھرا سانحہ ہے، جس کے زخم آج بھی پوری قوم کے دلوں میں تازہ ہیں۔ ایسے انتہائی حساس قومی المیے کو سستی سیاسی پوائنٹ سکورنگ کے لیے استعمال کرنا قوم کے زخموں پر نمک پاشی کے مترادف ہے۔

انہوں نے مزید کہا کہ سقوطِ ڈھاکہ کا ذمہ دار شہید ذوالفقار علی بھٹو کو قرار دینے سے پہلے خواجہ سعد رفیق کو حمود الرحمٰن کمیشن کی رپورٹ کا بغور مطالعہ کر لینا چاہیے تھا، جس میں اصلی اور حقیقی عوامل کی نشاندہی کی گئی ہے۔ شرجیل میمن نے یاد دہانی کرائی کہ شہید ذوالفقار علی بھٹو وہی عظیم رہنما ہیں جنہوں نے اس ملک کو 1973ء کا متفقہ آئین دیا اور ملکی دفاع کو ناقابلِ تسخیر بنانے کے لیے ایٹمی پروگرام کی بنیاد رکھی۔ انہوں نے مسلم لیگ (ن) کی قیادت کو مشورہ دیا کہ وہ ماضی کے تلخ قومی سانحات کو اپنے سیاسی مفادات کے لیے بطور ہتھیار استعمال کرنے سے مکمل گریز کرے۔