مشرق وسطیٰ میں کارروائیاں: بلغاریہ نے امریکی فوج کو فضائی اڈا استعمال کرنیکی اجازت دیدی

بلغاریہ کی پارلیمنٹ نے امریکی فوج کو مشرقِ وسطیٰ میں جاری عسکری کارروائیوں اور لاجسٹک امداد کے لیے اپنے ملک کا ایک اہم فضائی اڈہ (ایئر بیس) استعمال کرنے کی باضابطہ اجازت دے دی ہے۔ ارکانِ پارلیمنٹ نے اس سلسلے میں حکومت کی جانب سے پیش کی گئی تجویز کی کثرتِ رائے سے منظوری دے دی۔

رپورٹس کے مطابق امریکی حکومت نے جمعہ کے روز بلغاریہ سے مشرقِ وسطیٰ کی کشیدہ صورتحال کے تناظر میں فوجی اڈے کے استعمال کی باقاعدہ درخواست کی تھی۔ طے شدہ معاہدے کے تحت بلغاریہ نے امریکہ کو مشرقِ وسطیٰ میں آپریشنز اور ایندھن کی فراہمی کے لیے زیادہ سے زیادہ 8 کے سی-135 (KC-135) ٹینکر طیارے اور 250 امریکی فوجی اہلکار تعینات کرنے کی اجازت دی ہے۔

تاہم پارلیمنٹ میں رائے شماری کے دوران کئی ارکانِ پارلیمنٹ نے اس فیصلے پر گہری تشویش کا اظہار کیا ہے۔ مخالف اور تحفظات رکھنے والے ارکان کا کہنا ہے کہ امریکہ کو ایئر بیس کی فراہمی سے بلغاریہ براہِ راست ایران اور امریکہ کے درمیان جاری جنگ میں ملوث ہو سکتا ہے، جس سے ملک کی اپنی سیکیورٹی اور علاقائی سلامتی پر بھی منفی اثرات مرتب ہونے کا خدشہ ہے۔