ایرانی حملوں میں ہلاک مزید 4 امریکی فوجیوں کی میتیں وطن پہنچ گئیں

مشرقِ وسطیٰ میں ایرانی میزائل حملوں کے نتیجے میں ہلاک ہونے والے 4 امریکی فوجیوں کی میتیں امریکہ پہنچا دی گئی ہیں، جہاں ڈوور ایئر فورس بیس پر ان تابوتوں کی منتقلی کی ایک باوقار اور غمگین تقریب منعقد کی گئی۔

بین الاقوامی خبر ایجنسی کے مطابق اس حزن و ملال سے بھرپور تقریب میں امریکی صدر ڈونلڈ ٹرمپ اور وزیرِ دفاع پیٹ ہیگستھ نے خصوصی طور پر شرکت کی۔ صدر ٹرمپ اور وزیر دفاع نے ملکی پرچم میں لپٹے تابوتوں کی منتقلی کا احترام سے جائزہ لیا اور ہلاک ہونے والے فوجیوں کو حتمی سلامی پیش کی۔

رپورٹ میں بتایا گیا ہے کہ اردن کے موافق السلطی ایئر بیس پر ایرانی میزائل کے تباہ کن حملے میں 3 امریکی فوجی ہلاک ہوئے تھے، جن کی شناخت 25 سالہ ٹائلر فیہان، 28 سالہ سارجنٹ اینجل رامپرساد اور صرف 19 سالہ ازابیلا گونزالس کے ناموں سے ہوئی ہے۔ جبکہ عراق کے شہر اربیل میں ہونے والے ایک علیٰحدہ حملے میں امریکی سارجنٹ مائیکل سوئنٹن اپنی جان سے ہاتھ دھو بیٹھے تھے۔

خبر ایجنسی کے مطابق خطے میں حالیہ ایرانی عسکری کارروائیوں اور جواباتی حملوں میں ہلاک ہونے والے امریکی فوجی اہلکاروں کی مجموعی تعداد اب بڑھ کر 18 ہو چکی ہے، جس سے دونوں ممالک کے درمیان جاری کشیدگی میں مزید خطرے کے بادل منڈلانے لگے ہیں۔