آبنائے ہرمز میں امریکی بحری ناکہ بندی مزید سخت، سیکڑوں جہازوں کا راستہ تبدیل

امریکی سینٹرل کمانڈ (CENTCOM) نے دعویٰ کیا ہے کہ بین الاقوامی پابندیوں کے نفاذ اور سیکیورٹی اقدامات کے تحت آبنائے ہرمز اور ایرانی بندرگاہوں کے گرد جاری بحری ناکہ بندی کو مزید سخت کر دیا گیا ہے۔ امریکی فوجی حکام کے مطابق اس دوران احکامات کی خلاف ورزی کرنے والے ایک بحری جہاز کو کارروائی کرتے ہوئے ناکارہ بھی بنا دیا گیا ہے۔

سینٹ کام کی جانب سے جاری کردہ تازہ ترین بیان کے مطابق، سخت ناکہ بندی اور مسلسل نگرانی کے نتیجے میں اب تک 140 سے زائد بحری جہازوں نے اپنا طے شدہ سمندری راستہ تبدیل کر لیا ہے۔ سینٹ کام نے مزید انکشاف کیا کہ اس ناکہ بندی کی کمپین کے دوران اب تک احکامات اور پابندیوں کی خلاف ورزی کرنے والے مجموعی طور پر 9 بحری جہازوں کو ناکارہ بنایا جا چکا ہے۔

امریکی عسکری حکام کا کہنا ہے کہ یہ تمام تر سخت اقدامات خطے میں بحری نقل و حمل کی سخت نگرانی اور ایران پر عائد پابندیوں پر مؤثر اور بلاامتیاز عمل درآمد کو یقینی بنانے کے سلسلے میں کیے جا رہے ہیں۔ امریکہ کا کہنا ہے کہ وہ اہم سمندری گزرگاہوں کی نقل و حرکت اور پالیسیوں پر سختی سے عمل درآمد جاری رکھے گا۔