باقر قالیباف کی قطر اور پاکستان کے ذریعے امریکا کو پیغامات پہنچانے کی تصدیق

ایران کی پارلیمان کے سپیکر باقر قالیباف نے تصدیق کی ہے کہ تہران نے ثالثی کرانے والے ممالک کے ذریعے امریکہ کو اپنے اہم پیغامات اور پیشگی شرائط سے باضابطہ طور پر آگاہ کر دیا ہے۔ ایرانی پارلیمنٹ کے اجلاس سے خطاب کرتے ہوئے باقر قالیباف نے کہا کہ عالمی سطح پر جنگ کی باتیں تو کی جاتی ہیں، لیکن اس کے حتمی اور موثر خاتمے کے لیے کوئی واضح لائحہ عمل یا طریقہ کار پیش نہیں کیا جاتا۔

ان کا کہنا تھا کہ ایران کی حکمتِ عملی واضح ہے، جس کے تحت بیک وقت دفاعی جنگ اور مذاکرات دونوں کو ساتھ لے کر چلنا ہوگا۔ تہران اپنے دشمنوں کو پیچھے دھکیلنے کے لیے اپنی تمام تر فوجی طاقت کا استعمال جاری رکھے گا، جبکہ مناسب وقت آنے پر میدانِ جنگ میں حاصل ہونے والی کامیابیوں کو سیاسی و سفارتی سطح پر مستحکم کرنے کے لیے سفارت کاری کو بروئے کار لایا جائے گا۔

اسپیکر ایرانی پارلیمان نے خبردار کرتے ہوئے کہا کہ جب تک ایران کی جانب سے رکھی گئی تمام پیشگی شرائط پوری نہیں ہو جاتیں، اس وقت تک نہ تو مذاکرات کی سابقہ صورتِ حال بحال ہو سکتی ہے اور نہ ہی آبنائے ہرمز کو کھولنے کی کوئی گنجائش پیدا ہوگی۔ واضح رہے کہ اس سے قبل ایران کی سپریم نیشنل سیکیورٹی کونسل کے سیکرٹری محسن رضائی نے بھی اعلان کیا تھا کہ تہران نے قطر اور پاکستان کے ثالثوں کے توسط سے امریکہ کو اپنی شرائط پہنچا دی ہیں اور اب امریکی ردِعمل کا انتظار کیا جا رہا ہے۔