عرب ممالک سے کوئی دشمنی نہیں، حملے میں فریق نہ بنیں: ایران کا پیغام

ایران نے واضح کیا ہے کہ اس کی کسی بھی عرب ملک سے دشمنی نہیں اور اس کا ردعمل صرف امریکی اڈوں اور تنصیبات کے خلاف ہے۔

ایرانی وزیر خارجہ عباس عراقچی نے عرب ممالک کو پیغام دیتے ہوئے کہا کہ وہ جاری حملوں میں فریق نہ بنیں۔ ان کا کہنا تھا کہ ایران کے عرب ممالک کے ساتھ صدیوں پر محیط دوستانہ تعلقات رہے ہیں۔

عباس عراقچی نے مزید کہا کہ ایران پر ہونے والے امریکی حملے بعض اوقات عرب ممالک کی سرزمین سے کیے جا رہے ہیں جبکہ ان حملوں میں بچوں اور بے گناہ شہریوں کو بھی نشانہ بنایا جا رہا ہے۔دوسری جانب ایرانی نائب وزیر خارجہ مجید تخت روانچی نے کہا کہ ایران نے ڈرون حملے کے ذریعے آذربائیجان کو نشانہ نہیں بنایا۔ ان کے مطابق امریکا اور اسرائیل نے ایران پر جنگ مسلط کی ہے۔انہوں نے کہا کہ ایران نے مذاکرات میں نیک نیتی کا مظاہرہ کیا مگر امریکا نے اپنا رویہ تبدیل کر لیا۔مجید تخت روانچی کا کہنا تھا کہ ایران کو امریکا پر اعتماد نہیں کیونکہ امریکا نے ماضی میں سفارت کاری کے نام پر بھی دھوکا دیا ہے۔