ایران نے آبنائے ہرمز میں جہاز رانی کے انتظام سے متعلق عمان کی تجویز مسترد کردی

ایران نے آبنائے ہرمز میں جہاز رانی کے انتظام سے متعلق عمانی تجویز کو مسترد کرتے ہوئے نیا مطالبہ پیش کر دیا ہے کہ عمانی حدود میں واقع بحری راستے کے ایک حصے کا کنٹرول بھی ایران کے پاس ہونا چاہیے۔ ایرانی نائب وزیر خارجہ کاظم غریب آبادی نے سرکاری ٹی وی سے گفتگو کرتے ہوئے بتایا کہ عمان نے دونوں ممالک کے درمیان بحری راستے کو مساوی طور پر (50 فیصد ایرانی اور 50 فیصد عمانی علاقائی پانیوں میں) تقسیم کرنے کی تجویز دی تھی، جس کے تحت جہاز ایرانی پانیوں سے داخل ہو کر عمانی پانیوں سے گزرتے۔

کاظم غریب آبادی کے مطابق ایران نے واضح کیا ہے کہ وہ ایرانی پانیوں میں واقع بحری گزرگاہ کے حصے کا انتظام خود سنبھالے گا، جبکہ عمانی پانیوں میں موجود راستے کے کچھ حصے کا کنٹرول بھی ایران کے سپرد کیا جائے۔ انہوں نے خبردار کرتے ہوئے کہا کہ اگر عمان نے ایران کی اس جدید تجویز کو قبول نہ کیا تو آبنائے ہرمز میں بحری آمدورفت مکمل طور پر بند رہے گی۔