آپ بھائی ہیں، ہمارا آپ سے کوئی تنازع نہیں، ایرانی صدر کا ہمسایہ ممالک کے نام پیغام

تہران: ایرانی صدر مسعود پزشکیان نے عید الفطر کے پرمسرت موقع پر اسلامی اور ہمسایہ ممالک کے نام ایک خصوصی پیغام جاری کیا ہے، جس میں انہوں نے اتحادِ امت پر زور دیتے ہوئے کہا کہ “آپ ہمارے بھائی ہیں اور ہمارا آپ سے کسی قسم کا کوئی تنازع نہیں ہے”۔ صدر پزشکیان نے واضح کیا کہ مسلم ممالک کے درمیان اختلافات کا براہِ راست فائدہ صرف صیہونی ریاست کو پہنچ رہا ہے۔ انہوں نے دعا کی کہ اللہ تعالیٰ تمام مسلم اقوام کو اتحاد اور طاقت عطا فرمائے تاکہ نبی کریم ﷺ کی تعلیمات پر عمل پیرا ہو کر رضائے الٰہی حاصل کی جا سکے۔

دوسری جانب، ایرانی وزیر خارجہ عباس عراقچی نے جاپانی میڈیا کو انٹرویو دیتے ہوئے خطے کی صورتحال پر تہران کا موقف سختی سے پیش کیا۔ انہوں نے کہا کہ یہ ایران کی جنگ نہیں بلکہ ان پر مسلط کی گئی ہے، اور ایران صرف اپنے دفاع میں اقدامات کر رہا ہے۔ عباس عراقچی کا کہنا تھا کہ “ہم امریکہ کے ساتھ مذاکرات کے عمل میں تھے جب امریکہ اور اسرائیل نے غیر قانونی اور بلا اشتعال حملہ کیا”۔

ایرانی وزیر خارجہ نے مزید کہا کہ بظاہر ایسا نہیں لگتا کہ امریکہ اپنی جارحیت ختم کرنے کے لیے تیار ہے، اور اب اسرائیل کے ساتھ جنگ کے خاتمے کے لیے محض ‘جنگ بندی’ کافی نہیں ہوگی۔ انہوں نے عزم ظاہر کیا کہ جب تک ضروری ہوا، ایران اپنی حفاظت کے لیے دفاعی اقدامات جاری رکھے گا۔