امریکا نے حملے روکے تو ہم نے بھی جوابی کارروائیاں معطل کر دیں: ایرانی فوج

ایرانی فوج کے ترجمان محمد اکرامینیا نے تصدیق کی ہے کہ امریکا کی جانب سے دو راتوں کے دوران حملے روکنے کے بعد ایران نے بھی اپنی جوابی کارروائیاں معطل کر دی ہیں۔ انہوں نے امریکی فیصلوں اور سینٹکام کی کارکردگی کو عدم حکمتِ عملی اور تھکن کا عکاس قرار دیتے ہوئے کہا کہ حالیہ دو ہفتوں کی لڑائی کے دوران ایران کا بنیادی ہدف امریکی ریڈار اور سپورٹ مراکز تھے تاکہ واشنگٹن کو مفاہمتی معاہدوں کی پاسداری اور مذاکرات کی میز پر واپس لایا جا سکے۔ اس پیش رفت کے ساتھ ہی ایرانی فوج کے دوسرے ترجمان جنرل ابوالفضل شکارچی نے کہا کہ امریکا آبنائے ہرمز کے معاملے اور ایران کو کمزور کرنے میں ناکام رہا ہے۔ دوسری جانب امریکی ذرائع ابلاغ کے مطابق صدر ڈونلڈ ٹرمپ نے دفاعی میزائلوں کے ذخائر میں کمی کے باعث ایران پر مزید وسیع حملوں کا منصوبہ فی الحال مؤخر کر دیا ہے۔