آبنائے ہرمز سے متعلق ایران، عمان فریم ورک پر متفق، حتمی منظوری باقی ہے: حسن قشقاوی

ایرانی پارلیمنٹ کی قومی سلامتی کمیٹی کے ترجمان حسن قشقاوی نے بتایا ہے کہ آبنائے ہرمز کے معاملے پر ایران اور عمان عمومی فریم ورک پر متفق ہو گئے ہیں، تاہم معاہدے کی حتمی منظوری ابھی باقی ہے۔

حسن قشقاوی کے مطابق دونوں ممالک کے درمیان مفاہمت کے بنیادی اور عمومی خدوخال طے پا چکے ہیں، جبکہ حتمی منظوری ایران کی اعلیٰ قیادت فراہم کرے گی۔ انہوں نے مزید کہا کہ اس اہم پیشرفت سے متعلق تمام تفصیلی نکات جلد ہی باضابطہ طور پر عام کر دیے جائیں گے۔

ایرانی ترجمان نے امریکی رویے پر بات کرتے ہوئے واضح کیا کہ امریکا کو پہلے “اسلام آباد معاہدے” کے تحت اپنی طے شدہ ذمہ داریوں کو پورا کرنا ہوگا۔ ان کا کہنا تھا کہ امریکا پر لازم ہے کہ وہ ایران پر عائد اقتصادی پابندیوں میں نرمی کرے، خطے میں دشمن بحری جہازوں کی آمد و رفت کو روکے اور لبنان سے متعلق کیے گئے تمام بین الاقوامی وعدوں پر مکمل عملدرآمد یقینی بنائے۔