ایران کے نئے لانچ سسٹمز امریکا و اسرائیل کو حیران کر دیں گے، سید ماجد موسوی

تہران: ایرانی پاسدارانِ انقلاب کی ایرو اسپیس فورس کے کمانڈر سید ماجد موسوی نے دشمن ممالک کو خبردار کرتے ہوئے کہا ہے کہ ایران کے نئے میزائل لانچ سسٹمز امریکہ اور اسرائیل کو حیران کر دیں گے۔ سوشل میڈیا پلیٹ فارم ‘ایکس’ پر جاری اپنے پیغام میں انہوں نے دعویٰ کیا کہ ایران کی نئی میزائل صلاحیتیں خطے میں طاقت کے توازن کو مکمل طور پر تبدیل کرنے کی صلاحیت رکھتی ہیں۔

سید ماجد موسوی کا کہنا تھا کہ ایران کی میزائل طاقت نے مقبوضہ علاقوں کے آسمانوں پر برتری حاصل کر لی ہے اور ان جدید نظاموں کی وجہ سے دشمن ممالک دنگ رہ جائیں گے۔ یہ بیان ایک ایسے وقت میں سامنے آیا ہے جب حالیہ رپورٹس کے مطابق ایران نے اسرائیل کے انتہائی حساس ‘دیمونا پاور پلانٹ’ پر میزائل حملے کیے ہیں، جس نے اسرائیلی دفاعی نظام کی کارکردگی پر سوالات اٹھا دیے ہیں۔

عسکری ماہرین کے مطابق، ایران نے پہلی بار درمیانے فاصلے تک مار کرنے والے بیلسٹک میزائلوں کا استعمال کرتے ہوئے قبرص میں بھی ایک ہدف کو نشانہ بنایا ہے۔ اس کارروائی سے عالمی سطح پر یہ بحث چھڑ گئی ہے کہ تہران کی میزائل رینج اور نشانہ بنانے کی صلاحیت پہلے سے کہیں زیادہ بڑھ چکی ہے، جو کہ بحیرہ روم تک پھیلے ہوئے اہداف کو براہِ راست خطرے میں ڈال سکتی ہے۔