ایران نے جدید جنگی اور خودکش ڈرونز کی تیاری کی پہلی ویڈیو جاری کردی

ایران کی مسلح افواج نے پہلی بار مقامی سطح پر تیار کیے گئے جدید ترین جنگی اور خودکش ڈرونز کی ویڈیو جاری کر دی ہے، جس میں ایرانی فوجی تنصیبات کے اندر جدید ترین بغیر پائلٹ فضائی گاڑیوں (UAVs) کی تیاری کا عمل دکھایا گیا ہے۔

ایرانی میڈیا کے مطابق آرمی چیف میجر جنرل امیر حاتمی نے ڈرونز اور حملہ آور ٹیکنالوجی تیار کرنے والی خفیہ اور جدید ترین فوجی تنصیب کا دورہ کیا۔ اس موقع پر میڈیا سے گفتگو کرتے ہوئے انہوں نے واضح کیا کہ ایران ہر قسم کے جنگی حالات سے نپٹنے کے لیے مکمل طور پر تیار اور فعال ہے۔

میجر جنرل امیر حاتمی نے کہا کہ ایرانی فوج نے ڈرون ٹیکنالوجی میں نمایاں پیش رفت اور پختگی حاصل کر لی ہے، جبکہ ڈرونز، بغیر پائلٹ بحری جہازوں (Unmanned Vessels) اور چھوٹے طیاروں کے آپریشنل استعمال میں مزید وسعت لائی جا رہی ہے۔ انہوں نے دعویٰ کیا کہ ایران ممکنہ جنگ کے لیے معیار اور تعداد دونوں لحاظ سے مضبوط پوزیشن میں ہے اور وہ دشمن کی تمام تر حکمت عملیوں سے بخوبی آگاہ ہے۔