لارک جزیرے پر حملے کے بعد ایران کے امریکی فوجی اڈوں، بحری جہازوں پر جوابی حملے

لارک جزیرے پر امریکی حملے کے جواب میں ایران کی سپاہِ پاسدارانِ انقلاب نے اردن میں قائم 2 امریکی فوجی اڈوں، ‘کنگ حسین’ اور ‘الازرق’ کو بیلسٹک میزائلوں سے نشانہ بنانے کا دعویٰ کیا ہے۔ ایرانی سرکاری میڈیا کے مطابق، پاسدارانِ انقلاب نے اس کارروائی کو لارک جزیرے پر ہونے والے امریکی حملے کا براہِ راست ردِعمل قرار دیا ہے جس میں متعدد ایرانی فوجی اور شہری شہید و زخمی ہوئے تھے۔ دوسری جانب، امریکی حکام نے بتایا ہے کہ ایران کی طرف سے داغے گئے تقریباً تمام میزائلوں کو فضا میں ہی امریکی اور اتحادی دفاعی نظام نے ناکام بنا دیا، جس سے کسی بڑے نقصان کی اطلاع نہیں ملی۔ یہ کشیدگی اس وقت بڑھی جب امریکا نے آبنائے ہرمز میں بحری بارودی سرنگیں بچھانے کی تیاری ناکام بنانے کا دعویٰ کرتے ہوئے لارک جزیرے پر فضائی حملہ کیا تھا۔